2Ch 28 | Ndebele | STEP | UAhazi wayeleminyaka engamatshumi amabili esiba yinkosi; wabusa iminyaka elitshumi lesithupha eJerusalema. Kodwa kenzanga okuqondileyo emehlweni eN kosi , njengoDavida uyise .

2 Chronicles 28

Ukubusa kukaAhazi

1 UAhazi wayeleminyaka engamatshumi amabili esiba yinkosi; wabusa iminyaka elitshumi lesithupha eJerusalema. Kodwa kenzanga okuqondileyo emehlweni eNkosi, njengoDavida uyise ^a. 2 Ngoba wahamba ezindleleni zamakhosi akoIsrayeli, wasesenzela oBhali ^b izithombe ezibunjwe ngokuncibilikisa ^c. 3 Yena watshisa impepha esihotsheni sendodana kaHinomu ^d, watshisa lamadodana akhe emlilweni, njengokwamanyala ezizwe iNkosi eyazixotsha elifeni phambi kwabantwana bakoIsrayeli ^e. 4 Wanikela imihlatshelo watshisa impepha endaweni eziphakemeyo laphezu kwamaqaqa langaphansi kwaso sonke isihlahla esiluhlaza. 5 Ngakho iNkosi uNkulunkulu wakhe yamnikela esandleni senkosi yeSiriya; asemtshaya, athumba kuye abathunjiweyo abanengi, abasa eDamaseko ^f. Futhi wanikelwa esandleni senkosi yakoIsrayeli eyamtshaya ngokutshaya okukhulu.

6 Ngoba uPheka indodana kaRemaliya ^g wabulala koJuda abazinkulungwane ezilikhulu lamatshumi amabili ngasuku lunye, bonke bengamadoda alamandla, ngoba babeyidelile iNkosi uNkulunkulu waboyise. 7 UZikiri iqhawe lakoEfrayimi wasebulala uMahaseya indodana yenkosi ^h loAzirikamu umphathi wendlu loElkana owesibili enkosini ⁱ. 8 Abantwana bakoIsrayeli basebethumba kubafowabo abazinkulungwane ezingamakhulu amabili, abesifazana, amadodana, lamadodakazi; baphanga lempango enengi kibo, bayiletha impango eSamariya ^j. 9 Kodwa kwakukhona lapho umprofethi weNkosi obizo lakhe lalinguOdedi; wasephuma phambi kwebutho elalisiza eSamariya, wathi kibo: Khangelani, ngenxa yolaka lweNkosi uNkulunkulu waboyihlo phezu kukaJuda ^k, ibanikele esandleni senu; libabulele-ke ngolaka olufinyelele emazulwini ^l. 10 Khathesi-ke lina lithi lehlisela ngaphansi kwenu abantwana bakoJuda labeJerusalema babe yizigqili lezigqilikazi. Kodwa lina kakulamacala yini kini amelene leNkosi uNkulunkulu wenu? 11 Ngakho-ke ngilalelani; libuyisele abathunjiweyo elibathumbe kubafowenu, ngoba ukuvutha kolaka lweNkosi kuphezu kwenu. 12 Kwasekusukuma amadoda kunhloko zabantwana bakoEfrayimi, oAzariya indodana kaJohanani, uBerekiya indodana kaMeshilemothi, loJehizikiya ^m indodana kaShaluma ⁿ, loAmasa indodana kaHadilayi, bamelana lalabo ababengena bevela ebuthweni. 13 Basebesithi kibo: Kaliyikungenisa abathunjiweyo lapha kube licala eNkosini limelene lathi; ngoba lina lithi lizakwengeza ezonweni zethu lemacaleni ethu, ngoba isiphambeko sethu sikhulu, lokuvutha kolaka kuphezu kukaIsrayeli. 14 Ngakho abahlomileyo batshiya abathunjiweyo lempango phambi kweziphathamandla lebandla lonke ^o. 15 Lamadoda abizwa ngamabizo asukuma, abamba abathunjiweyo ^p, agqokisa bonke ababenqunu babo ngokuvela empangweni; yebo abagqokisa, abafaka amanyathela, abanika ukudla, abanathisa ^q, abagcoba, athwala bonke ababuthakathaka ngabobabhemi ^r, abasa eJeriko, umuzi wamalala, duze labafowabo; basebebuyela eSamariya ^s.

16 Ngalesosikhathi inkosi uAhazi yathuma emakhosini eAsiriya ukumncedisa. 17 Ngoba amaEdoma ayesebuye atshaya uJuda, athumba abathunjwa ^t. 18 LamaFilisti ^u ayehlasele imizi ^v yesihotsha ^w leningizimu yakoJuda, athumba iBeti-Shemeshi ^x, leAjaloni ^y, leGederothi ^z, leSoko ^aa lemizana yayo ^ab, leTimina ^ac lemizana yayo ^ad, leGimizo lemizana yayo ^ae; ahlala khona. 19 Ngoba iNkosi yamthobisa uJuda ngenxa kaAhazi inkosi yakoIsrayeli ^af, ngoba wamenza ze uJuda, wasephambuka kakhulu eNkosini ^ag. 20 Ngakho uTiligathi-Pileseri inkosi yeAsiriya ^ah wafika kuye, wamhlupha, kodwa kamqinisanga. 21 Ngoba uAhazi wathatha isabelo sendlu kaJehova lesendlu yenkosi leseziphathamandla, wasipha inkosi yeAsiriya; kodwa kayimsizanga ^ai.

22 Ngesikhathi sohlupho lwakhe wengeza-ke ekuphambekeni emelene loJehova. Le yinkosi uAhazi. 23 Ngoba wahlabela onkulunkulu beDamaseko ababemtshayile ^aj, wathi: Ngoba onkulunkulu bamakhosi eSiriya bayawasiza, ngizahlabela bona ukuze bangisize ^ak. Kodwa bona baba yimbangela yokuwa kwakhe ^al, kuye lakuIsrayeli wonke ^am. 24 UAhazi waseqoqa izitsha zendlu kaNkulunkulu, waziquma iziqa izitsha zendlu kaNkulunkulu ^an, wavala iminyango yendlu yeNkosi ^ao, wazenzela amalathi kuyo yonke ingonsi eJerusalema ^ap. 25 Lakuwo wonke umuzi ngomuzi wakoJuda wenza indawo eziphakemeyo zokutshisela abanye onkulunkulu impepha, wayithukuthelisa iNkosi uNkulunkulu waboyise ^aq.

26 Ezinye-ke zezindaba zakhe lazo zonke indlela zakhe ^ar, ezokuqala lezokucina, khangela, zibhaliwe egwalweni lwamakhosi akoJuda lawakoIsrayeli ^as. 27 UAhazi waselala laboyise, basebemngcwabela emzini, eJerusalema; kodwa kabamlethanga emangcwabeni amakhosi ^at akoIsrayeli ^au. UHezekhiya indodana yakhe wasesiba yinkosi esikhundleni sakhe.